The Sky Crawlers ဆိုတဲ့ Anime ကားလေးက ဂန္ထဝင် Sci-Fi လက်ရာ Ghost in the Shell (1995) ရဲ့ ဒါရိုက်တာကြီး Mamoru Oshii နဲ့ နာမည်ကျော် စတူဒီယို Production I.G တို့ ပူးပေါင်းဖန်တီးခဲ့တဲ့ အနုပညာဆန်ပြီး ဒဿနဆန်ဆန် နက်နဲလှတဲ့ Psychological / Military Sci-Fi ရုပ်ရှင်ကားကြီး ဖြစ်ပါတယ်ဗျ။ Hiroshi Mori ရဲ့ နာမည်ကြီး ဝတ္ထုစီးရီးကို အခြေခံထားပြီး၊ အပေါ်ယံအားဖြင့် လေယာဉ်တိုက်ပွဲ အက်ရှင်ကားလို့ ထင်ရပေမဲ့ အတွင်းသရုပ်မှန်မှာတော့ လူသားတွေရဲ့ တည်ရှိမှု၊ ထာဝရရှင်သန်ခြင်းနဲ့ စစ်ပွဲတွေရဲ့ အဓိပ္ပာယ်မဲ့မှုကို ရိုက်ခတ်တင်ပြထားတဲ့ လက်ရာမွန်တစ်ခုဆိုလည်း မမှားပါဘူး။ ဇာတ်လမ်းလေးကတော့ ကမ္ဘာကြီးမှာ စစ်မှန်တဲ့ စစ်ပွဲတွေ မရှိတော့ဘဲ ငြိမ်းချမ်းရေး ရရှိထားတဲ့ အပြိုင်သမိုင်းခေတ် (Alternate Reality) တစ်ခုကို နောက်ခံထားပါတယ်။ ဒါပေမဲ့ လူ့အဖွဲ့အစည်းဟာ စစ်ပွဲရဲ့ အကြောက်တရားမရှိရင် ငြိမ်းချမ်းရေးရဲ့ တန်ဖိုးကို မေ့လျော့သွားတတ်တာကြောင့် ကော်ပိုရေးရှင်း ကုမ္ပဏီကြီး နှစ်ခုက ပရိသတ်တွေကို ဖျော်ဖြေရေးအနေနဲ့ ကြည့်ရှုဖို့အတွက် "စစ်ပွဲအတုတွေ" ကို စာချုပ်ချုပ်ပြီး ကောင်းကင်ယံမှာ လေယာဉ်ချင်း ပစ်ခတ်တိုက်ခိုက်စေပါတယ်။ ဒီစစ်ပွဲတွေမှာ မောင်းနှင်တဲ့ လေယာဉ်မှူးတွေကလည်း သာမန်လူတွေ မဟုတ်ပါဘူး။ သူတို့ဟာ "Kildren" (ကီလ်ဒရန်) လို့ ခေါ်တဲ့ မျိုးရိုးဗီဇပြုပြင်ထားပြီး ဘယ်တော့မှ အသက်မကြီးဘဲ ထာဝရ ဆယ်ကျော်သက်အရွယ်မှာပဲ ရပ်တန့်နေတဲ့ ဇီဝဖန်တီးမှု လူသားလေးတွေပဲ ဖြစ်ပါတယ်။ ဒီဇာတ်လမ်းမှာက အဓိကဇာတ်ကောင် လေယာဉ်မှူးလေး ခန်နာမီဟာ စခန်းအသစ်ကို ပြောင်းရွှေ့ရောက်ရှိလာပြီး စခန်းမှူး ကူဆာနာဂီ နဲ့ တွေ့ဆုံရာကနေ... သူ့အရင်က ဒီစခန်းမှာ ရှိခဲ့တဲ့ လေယာဉ်မှူး ဘာကြောင့် ပျောက်ကွယ်သွားသလဲဆိုတဲ့ လျှို့ဝှက်ချက်နဲ့ ကီလ်ဒရန်တွေရဲ့ ထာဝရ သံသရာလည်နေတဲ့ ကံကြမ္မာအမှန်တရားကို တဖြည်းဖြည်း သဘောပေါက်လာပြီး ဘာတွေဆက်ဖြစ်မလဲဆိုတာကို လူသားတွေရဲ့ ရှင်သန်မှု အနှစ်သာရကို ကောင်းကင်ယံ စစ်တလင်းကနေတစ်ဆင့် မေးခွန်းထုတ်ထားတဲ့ Anime ကားလေး တစ်ကားပဲ ဖြစ်ပါကြောင်း ပြောလိုက်ပါရစေဗျာ...။